ബി.എം.ടി.സി ബസ്സുകൾ ഇനി ഹൈടെക്: ഡ്രൈവിംഗിനിടെ ഉറക്കം തൂങ്ങിയാൽ ബസ്സിൽ നിന്ന് കിട്ടും ‘സർപ്രൈസ്’; എന്താണ് എന്താണ് ഈ ‘അദാസ്’ വിദ്യ?

ബെംഗളൂരു: റോഡപകടങ്ങൾ കുറയ്ക്കാനും യാത്രക്കാരുടെയും കാൽനടയാത്രക്കാരുടെയും സുരക്ഷ ഉറപ്പാക്കാനുമായി ബി.എം.ടി.സി (BMTC) ബസ്സുകളിൽ അത്യാധുനിക ‘അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം’ (ADAS) നടപ്പിലാക്കുന്നു. ആദ്യഘട്ടത്തിൽ പരീക്ഷണാടിസ്ഥാനത്തിൽ 50 ബസ്സുകളിലാണ് ഈ എ.ഐ (AI) ക്യാമറയും സെൻസർ അധിഷ്ഠിതവുമായ സാങ്കേതികവിദ്യ സ്ഥാപിക്കുന്നത്. പദ്ധതി നടപ്പിലാക്കുന്നതിനായി കരാർ ഏജൻസിയെ തിരഞ്ഞെടുക്കാൻ ബി.എം.ടി.സി ടെൻഡർ ക്ഷണിച്ചു. തിരഞ്ഞടുക്കുന്ന ഏജൻസി രണ്ട് വർഷത്തേക്ക് ഇതിന്റെ പൂർണ്ണ പ്രവർത്തനവും പരിപാലനവും നിർവഹിക്കേണ്ടതുണ്ട്.

ബി.എം.ടി.സി ബസ്സുകളിൽ ‘അദാസ്’ എങ്ങനെ പ്രവർത്തിക്കും?
റോഡിലേക്ക് അഭിമുഖമായി നിൽക്കുന്ന ക്യാമറ, ഡ്രൈവറെ നിരീക്ഷിക്കുന്ന പ്രത്യേക ഡി.എം.എസ് (DMS) ക്യാമറ, ബസ്സിന്റെ വശങ്ങൾ നിരീക്ഷിക്കുന്ന രണ്ട് സൈഡ് ക്യാമറകൾ എന്നിവ അടങ്ങിയതാണ് ഈ സംവിധാനം.

വാഹനത്തിൽ ഘടിപ്പിച്ചിട്ടുള്ള പ്രത്യേക സെൻസറുകളും എഡ്ജ് കോംപ്യൂട്ടിംഗ് പ്രൊസസ്സറും അപകട സാധ്യതകൾ തത്സമയം വിശകലനം ചെയ്യുന്നു.

ഡ്രൈവറുടെ ശ്രദ്ധ തിരിയുകയോ ഉറക്കം തൂങ്ങുകയോ ചെയ്യുമ്പോൾ വാഹനത്തിനുള്ളിൽ തത്സമയ ശബ്ദ മുന്നറിയിപ്പുകൾ നൽകുന്നു.

ക്യാമറകളും സെൻസറുകളും കണ്ടെത്തുന്ന സുരക്ഷാ വിവരങ്ങൾ തത്സമയം തന്നെ ബി.എം.ടി.സിയുടെ കേന്ദ്രീകൃത കൺട്രോൾ റൂമിലേക്ക് കൈമാറുന്നു.

സുരക്ഷാ സവിശേഷതകൾ
ഡ്രൈവറുടെ ക്ഷീണം, ഡ്രൈവിംഗിനിടയിലെ ശ്രദ്ധക്കുറവ്, മൊബൈൽ ഫോൺ ഉപയോഗം, പുകവലി എന്നിവ കൃത്യമായി തിരിച്ചറിയാൻ ഡ്രൈവർ നിരീക്ഷണ ക്യാമറയ്ക്ക് സാധിക്കും.

തൊട്ടുമുന്നിലുള്ള വാഹനങ്ങളുമായി കൂട്ടിയിടിക്കാനുള്ള സാധ്യത, അനാവശ്യമായി ട്രാക്ക് മാറുന്നത്, റോഡിലെ കാൽനടയാത്രക്കാർക്ക് ഉണ്ടാകുന്ന അപകടസാധ്യതകൾ എന്നിവ റോഡ് ക്യാമറകൾ വഴി മുൻകൂട്ടി കണ്ടെത്തി ഡ്രൈവർക്ക് മുന്നറിയിപ്പ് നൽകും.

ബെംഗളൂരുവിലെ തിരക്കേറിയ റോഡുകളിൽ ഡ്രൈവറുടെ പെരുമാറ്റവും ശ്രദ്ധയും മെച്ചപ്പെടുത്തി വലിയ അപകടങ്ങൾ പൂർണ്ണമായി ഒഴിവാക്കാൻ ഈ സംവിധാനം സഹായിക്കും.

കേന്ദ്രീകൃത നിരീക്ഷണം
വാഹനങ്ങളിൽ നിന്ന് ലഭിക്കുന്ന വിവരങ്ങൾ ബി.എം.ടി.സിയുടെ സെൻട്രൽ ഡാഷ്‌ബോർഡുമായി ബന്ധിപ്പിക്കുന്നതാണ് ഇതിന്റെ പ്രധാന സവിശേഷത.

ഏത് ബസ്സിലാണ് സുരക്ഷാ വീഴ്ചയോ ഡ്രൈവറുടെ അശ്രദ്ധയോ ഉണ്ടാകുന്നത് എന്ന് ഉദ്യോഗസ്ഥർക്ക് കേന്ദ്രീകൃത കൺട്രോൾ റൂമിലിരുന്ന് തത്സമയം മനസ്സിലാക്കാനാകും.

ബി.എം.ടി.സി ഉപകരണങ്ങൾ പൂർണ്ണമായി വിലയ്ക്കുവാങ്ങുന്നതിന് പകരം, ഓരോ ബസ്സിനും പ്രതിമാസ വാടക നൽകുന്ന രീതിയിലാണ് പദ്ധതി നടപ്പിലാക്കുന്നത്.

മുൻപ് നടപ്പിലാക്കിയ പരീക്ഷണം
ഇതിനു മുൻപ് 2023-ൽ ബി.എം.ടി.സിയുടെ 10 ബസ്സുകളിൽ ഇത്തരം ‘അദാസ്’ സാങ്കേതികവിദ്യ പരീക്ഷണാടിസ്ഥാനത്തിൽ സ്ഥാപിച്ചിരുന്നു.

എന്നാൽ അത് ഒരു സ്വകാര്യ കമ്പനിയുടെ സി.എസ്.ആർ (CSR) ഫണ്ട് ഉപയോഗിച്ച് നടപ്പിലാക്കിയ പദ്ധതിയായിരുന്നുവെന്നും ബി.എം.ടി.സിയുടെ നേരിട്ടുള്ള പദ്ധതിയായിരുന്നില്ലെന്നും മുതിർന്ന ഉദ്യോഗസ്ഥർ വ്യക്തമാക്കി.

ഇപ്പോൾ ബി.എം.ടി.സി സ്വന്തമായി ടെൻഡർ വിളിച്ച് നടപ്പിലാക്കുന്ന 50 ബസ്സുകളിലെ പരീക്ഷണം വിജയകരമായാൽ നഗരത്തിലെ കൂടുതൽ ബസ്സുകളിലേക്ക് ഇത് വ്യാപിപ്പിക്കാനാണ് തീരുമാനം.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]